Bakı nəqliyyat sistemində rəqəmsal transformasiya davam edir.  
“K Group” MMC (Bakı Kart) Ölkənin ilk rəqəmsal bankı Birbank-ın təşəbbüskarlığı və texnoloji dəstəyi ilə Bakı nəqliyyatında rəqəmsal ödənişlərin genişlənməsi istiqamətində növbəti addımını atdı.  Artıq Bakı Metropoliteninin bütün stansiyalarında gediş haqqını NFC dəstəkli yerli bank kartları, eləcə də Apple Pay və Google Pay vasitəsilə ödəmək mümkündür. Bu yenilik təkcə Kapital Bank müştərilərini deyil, bütün yerli bank sektorunu əhatə edir və digər bankların müştəriləri üçün də bu imkanı yaradır. 
Bu yenilik şəhər nəqliyyatında nağdsız ödəniş ekosisteminin genişlənməsi və rəqəmsal transformasiyanın sürətlənməsi baxımından mühüm addımdır. 
Yeni sistem sayəsində sərnişinlər ödəniş üçün ayrıca kart axtarmağa ehtiyac duymur — sadəcə telefon, ağıllı saat və ya yerli bank kartı ilə bir toxunuş kifayətdir! 
NFC ödəniş sistemi sərnişin rahatlığını nəzərə alaraq, balansda kifayət qədər vəsait olmasa belə bir dəfəlik keçid imkanı təqdim edir. Bu yanaşma vətəndaşların səfərlərini problemsiz davam etdirməsini təmin edir. Növbəti gedişdən əvvəl isə istifadəçi kart balansını artıraraq əvvəlki ödənişi tamamlamalıdır. 
Əlavə olaraq bildirmək istərdik ki, Birbank və BakıKart-ın uğurlu əməkdaşlığı çərçivəsində bundan əvvəl də ictimai nəqliyyatda sərnişinlər üçün QR ödəniş imkanı istifadəyə verilib. Bu sistem sayəsində Birbank mobil tətbiqi üzərindən yaradılan QR bilet vasitəsilə paytaxt və Abşeron ərazisində metro və avtobuslardan istifadə edən sərnişinlər fiziki kart təqdim etmədən gediş haqlarını rahat və sürətli şəkildə ödəyə bilirlər. 
Yeniliklər bununla bitmir!  
İlin sonunadək bütün marşrut avtobuslarında da NFC ödəniş sistemi tam şəkildə tətbiq olunacaq. Bu addım sərnişinlərə metro və avtobuslarda eyni ödəniş rahatlığından istifadə imkanı yaradacaq. 
Bu layihə ilə Bakı nəqliyyatı daha çevik, müasir və texnoloji bir mərhələyə qədəm qoyur.  
Rəqəmsal ödənişlərin inkişafında növbəti mərhələyə keçidimiz mübarək olsun!