Bakı şəhərinin ictimai nəqliyyat sistemində rəqəmsal ödəniş imkanlarının genişləndirilməsi istiqamətində mühüm mərhələ uğurla tamamlanıb.

“K Group” MMC (BakıKart) ölkənin ilk rəqəmsal bankı olan Birbankın texnoloji dəstəyi ilə Bakı şəhəri üzrə bütün avtobus marşrutlarında və "Bakı Metropoliteni" QSC-nin bütün stansiyalarında NFC əsaslı ödəniş texnologiyasını tam şəkildə aktivləşdirib.

NFC ödənişləri zamanı əsas məqamlardan biri “ardıcıl 2 (iki) keçid imkanı”dır. Bu funksiya bank kartında kifayət qədər balans olmadığı halda sərnişinlərə avtobus və metrodan istifadə etməyə şərait yaradır. Qeyd edək ki, sözügedən keçidlər pulsuz deyil və kartda vəsait mövcud olduqda ödəniş məbləği avtomatik olaraq balansdan tutulur. Əgər kartda balans olmadan keçid alınsa, sonradan kartın ictimai nəqliyyatda istifadəsi müvəqqəti olaraq məhdudlaşdırıla bilər. Bu səbəbdən vətəndaşlara kart balansını vaxtında artırmaları tövsiyə olunur.

Beləliklə, BakıKart və tərəfdaşlarının birgə təşəbbüsü ilə Bakı şəhərinin ictimai nəqliyyatında tam rəqəmsal ödəniş mühiti formalaşdırılıb.